RSSB Tigers yatsinze Shanghai Sharks muri FIBA intercontinental cup

ikipe ya RSSB Tigers ihagarariye u Rwanda na Afurika, yatsinze Shanghai Sharks yo mu Bushinwa amanota 117-115, mu mukino wa kabiri wa FIBA Intercontinental Cup uri kubera i Beijing mu Bushinwa.

Ni intsinzi ya mbere RSSB Tigers yabonye nyuma yo kuba yari yatsinzwe na Rytas Vilnius ku munsi wa mbere w’iri rushanwa. Tigers yatsinze Shanghai Sharks amanota 117-115, mu mukino waranzwe no guhangana gukomeye kugeza ku munota wa nyuma.

Shanghai Sharks yatangiye umukino iri imbere, itsinda agace ka mbere ku manota 30-17. RSSB Tigers yaje kwisubiraho mu gace ka kabiri, ariko Shanghai ikomeza kujya mu karuhuko iyoboye umukino.

Mu gace ka gatatu amakipe yombi yatsinzemo amanota 25 kuri 25, ariko Tigers ikomeza kugaruka. Mu gace ka kane, RSSB Tigers yakoze akazi  gakomeye itsinda amanota 32 kuri 18, bituma umukino urangira amakipe anganya 103-103, bityo hongerwa iminota itanu.

Mu gihe cy’inyongera, RSSB Tigers yakomeje kurwana kugeza ku musozo, itsinda 14-12, maze umukino urangira Shanghai Sharks 115-117 RSSB Tigers.

Ku ruhande rwa Tigers, Craig Randall II yayoboye abandi mu gutsinda amanota, atsinda 30, mu gihe Tyler Bey yatsinze 19. Randall kandi yagize uruhare mu gufasha Tigers guhindura isura y’umukino nyuma yo kuba Shanghai yari yayoboye ku kinyuranyo kinini.

Iyi ntsinzi itumye RSSB Tigers igira intsinzi imwe n’itsinzwi imwe mu mikino ibiri ya Group A. Ku munsi wa mbere yari yatsinzwe na Rytas Vilnius 107-89, mbere yo kwisubiza icyizere itsinda Shanghai Sharks.

KWIHANGANA Emmanuel/Radio Salus