Mbappé yasobanuye impamvu yazamuye umwambaro wanditseho ubutumwa bwa Ceuta

Rutahizamu wa Real Madrid n'ikipe y'igihugu y'Ubufaransa, Kylian Mbappé, yasobanuye impamvu yazamuye umwambaro yari yambaye mbere y’umukino ikipe ye yakinnye na Elche, bigatuma igice cy’ubutumwa wari wanditseho kitagaragara neza.

Uwo mwambaro wari wanditseho ubutumwa bugira buti “Todos somos Caballas”, busobanuye ngo “Twese turi Abanya-Ceuta”. Mbappé yavuze ko gahunda yo kwambara iyo myambaro yari yemejwe n’amakipe, ariko ko we yazamuye umupira kugira ngo agaragaze ubutumwa bw’ubumwe no kwifatanya n’abantu bose bahuye n’ibibazo.

Mu kiganiro yagiranye na Diario AS ku wa 16 Nzeri 2026, Mbappé yavuze ko ashyigikiye abaturage ba Ceuta ndetse n’abantu bose bahuye n’ibibazo bijyanye n’abimukira bapfuye cyangwa bakomeje kubaho mu buzima bugoye nyuma yo kugerageza kwambuka bava muri Morocco bajya muri Ceuta.

Mbappé yagize ati: “Nshyigikiye byimazeyo Ceuta n’abahohotewe bose. Ariko mbere yo kuba umukinnyi, ndi umuntu.”

Uyu mukinnyi kandi yasobanuye ko igikorwa cye kitari kigamije kurwanya abaturage ba Ceuta, ahubwo ko yashakaga kwibutsa ko hari n’abandi bantu bafite imibabaro kandi bakwiye kwitabwaho.

Abakinnyi ba Real Madrid barimo Vinicius Jr na Ibrahima Konaté na bo bazamuye iyo myambaro, mu gihe abandi bakinnyi benshi bo muri La Liga bayambaye nk’uko gahunda yari yateganyijwe. 

Ceuta ni umujyi wa Espagne uherereye ku nkombe za Afurika y’Amajyaruguru, ku mupaka wa Morocco. Muri Nyakanga, abimukira benshi bagerageje kwambuka bajya muri Ceuta, aho abarenga 100 bapfuye nk’uko imibare yatanzwe n’ubuyobozi bw’uyu mujyi ibigaragaza.

Mbappé yavuze ko yifuza ko ubutumwa bwe bwumvikanamo amahoro, ubumwe n’icyizere, ndetse ko yifuza ko iki kibazo cyakemuka vuba.

NSENGIMANA Jean Bosco/Radio Salus