Umuhanzikazi Ingabire Deborah, uzwi ku izina rya Marina, yongeye kwerekana ubuhanga bwe ku rubyiniro, ashimisha imbaga y'abakunzi b'umuziki bitabiriye igitaramo cya MTN Iwacu Muzika Festival 2026 cyabereye mu Karere ka Karongi.
Yaserutse yambaye imyambaro ya jean (denim), ahita yakiranwa impundu n'amashyi menshi y'abafana bari bamwiteze. Marina yatangiranye n'indirimbo ye "Marina", mbere yo kubaza abari bitabiriye igitaramo niba biteguye kumwakira cyangwa niba yakwisubirira, maze bamusubiza mu majwi aranguruye ko bamwiteguye.
Yakomereje ku ndirimbo zirimo "Ikanisa", "Do Me", "Ni Wowe" na "Paje", zakomeje gususurutsa abafana baririmbana na we kuva ku ntangiriro kugeza ku musozo.
Marina yanaririmbye "Twivuyange", indirimbo yakoranye n'abahanzi barimo Afrique, Bushali, Austin na Mico The Best, mbere yo gukurikizaho "Mon Bébé" na "Too Much", zakiriwe neza n'abari muri iki gitaramo.
Yasoje igitaramo cye aririmba "Ifoto", indirimbo yakoranye na DJ Phil Peter, ari na yo yabaye imwe mu zakanguye amarangamutima y'abitabiriye igitaramo. Imibyinire ye n'imbaraga yagaragaje ku rubyiniro, by'umwihariko mu gice yakinnye ari kumwe na MC Buryohe, byatumye abafana basimbuka, barabyina ndetse baririmbana na we kugeza asoje.
Mu gihe yamaze ku rubyiniro, Marina yongeye kugaragaza ko ari umwe mu bahanzikazi bafite ubunararibonye bwo gususurutsa imbaga no gishimisha abakunzi b'umuziki.
Aaron DUSHIMIMANA/Radio Salus
Ibitekerezo 0
Tanga igitekerezo
Nta bitekerezo bihari.