Abagore bo mu cyaro bagiye kwagura ubucuruzi babifashijwemo n’inguzanyo za I&M

Abagore bakora ubucuruzi mu bice by’icyaro barimo gushakisha uburyo bwo kwagura ibikorwa byabo babifashijwemo n’inguzanyo zifite inyungu nto zitangwa na I&M Bank Rwanda Plc, binyuze muri gahunda za KATAZA na KWIHAZA zigamije guteza imbere ubucuruzi, kongera umusaruro w’ubuhinzi no guhanga imirimo mishya.

Asele Furaha, ukora ubucuruzi bw’akabari mu Karere ka Nyamagabe, ni umwe mu bacuruzi bifuza kubyaza umusaruro ayo mahirwe. Yifuza kubona inguzanyo ya miliyoni 20 z’amafaranga y’u Rwanda binyuze muri gahunda ya KATAZA, kugira ngo ashinge ububiko bw’ibinyobwa buzamufasha gukemura ibibazo by’itangwa ryabyo, bikomeje kugira ingaruka ku bucuruzi bwe no ku bandi bacuruzi bo mu gace atuyemo.

Gahunda ya KATAZA yashyizweho kugira ngo ifashe ibigo byujuje ibisabwa bikorera mu bukerarugendo, mu kwakira abantu n’izindi nzego zijyanye na byo kubona igishoro cyo kwagura ibikorwa byabyo. Ababyungukiramo bashobora kubona inguzanyo igera kuri miliyoni 25 z’amafaranga y’u Rwanda, ku nyungu ya 9% ku mwaka.

Umwihariko w’iyi gahunda ni uko inguzanyo zitangwa nta ngwate, amafaranga y’inyongera cyangwa komisiyo bisabwe, igihe uwasabye yujuje ibisabwa biteganywa na gahunda.

Ku rundi ruhande, gahunda ya KWIHAZA igamije gufasha ibigo byujuje ibisabwa bikorera mu ruhererekane rw’ibikorwa by’ubuhinzi byatoranyijwe kubona igishoro cyo guteza imbere ibikorwa byabyo. Ababyungukiramo bashobora kubona inguzanyo igera kuri miliyoni 150 z’amafaranga y’u Rwanda, ku nyungu ya 8% ku mwaka. Izi nguzanyo, muri rusange, zisaba ingwate.

Izi gahunda zitezweho gufasha ba rwiyemezamirimo bo mu cyaro kubona igishoro kibafasha kwagura ibikorwa byabo, kunoza imikorere no kongera ubushobozi bwo guhangana ku isoko. By'umwihariko, kubona amafaranga ku nyungu nto bishobora gufasha abacuruzi gushora imari mu bikorwa bibyara inyungu no gutanga akazi ku bandi baturage.

Mu rwego rwo gufasha abacuruzi kubyaza umusaruro aya mahirwe, I&M Bank Rwanda ikomeje kubegera ibagezaho amahugurwa n’ubujyanama ku micungire y’ubucuruzi. Aya mahugurwa agamije kubafasha kunoza ibitabo by’ibaruramari, gucunga neza imari no gutegura gahunda z’iterambere ry’ubucuruzi bwabo.

Ibi bifasha ba rwiyemezamirimo kurushaho gusobanukirwa imikorere y’ubucuruzi bwabo no kwitegura ibisabwa kugira ngo babone inguzanyo. Gahunda za KATAZA na KWIHAZA zigaragaza uburyo bwo guhuza serivisi z’imari n’amahugurwa agamije gufasha abikorera bo mu cyaro kwagura ibikorwa, kongera umusaruro no kugira uruhare mu iterambere ry’ubukungu.



Marie Rose NZAYISENGA/Radio Salus