Manchester City yahamijwe ibyaha 114 mu birego 115 bya Premier League

Manchester City yahamijwe ibyaha 114 ku birego 115 yari ishinjwa na Premier League, bijyanye no kutubahiriza amabwiriza agenga imari y’amakipe akina muri iyi shampiyona y’u Bwongereza.

Ku wa 25 Nzeri 2026, ibitangazamakuru byo mu Bwongereza byatangaje ko komisiyo yigenga yasuzumye dosiye y’iyi kipe, ikemeza ko hari ibirego byinshi byagaragayeho amakosa. Iperereza ryibanze ku bikorwa byabaye hagati ya 2009 na 2018.

Iyi dosiye yatangiye gufata intera nyuma y’aho mu 2018 hasohotse inyandiko z’ibanga zatangajwe n’ibitangazamakuru byo mu Budage, zagaragazaga ibibazo by’imicungire y’imari ya Manchester City.

Nubwo komisiyo yigenga yatangaje uyu mwanzuro, Manchester City yakomeje guhakana ibyo birego byose iregwa. Ikipe kandi yatangaje ko iteganya kujurira iki cyemezo, ishimangira ko mu myaka umunani yakurikije amabwiriza yariho.

Umuvugizi wa Manchester City yavuze ko ikipe igihagaze ku mwanya yatangaje muri Gashyantare 2023, aho yakomeje kuvuga ko Premier League n’abayobozi bayo bagomba gukora nk’inzego zigenga kandi zitabogama mu igenzura ry’amakipe.

Manchester City imaze imyaka myinshi iri mu makipe akomeye mu Bwongereza no ku ruhando mpuzamahanga. Kuva Sheikh Mansour yatangira kuyobora iyi kipe, yatwaye ibikombe umunani bya Premier League, FA Cup enye, League Cup zirindwi ndetse na UEFA Champions League imwe.

Muri ibyo bikombe bya Premier League, bitandatu byatanzwe nyuma y’uko iperereza ku birego by’iyi kipe ritangiye.

Nyuma y’iki cyemezo, haracyategerejwe kumenyekana ibihano Manchester City ishobora guhabwa. Premier League ishobora gufata ingamba hashingiwe ku buremere bw’amakosa komisiyo yigenga yemeje.

NSENGIMANA Jean Bosco/Radio Salus