Arsenal yanyagiye Coventry City mu mukino ufungura Premier League

Ikipe ya Arsenal ifite igikombe cya Premier League giheruka yatangiye neza umwaka w’imikino itsinda Coventry City ibitego 3-0 ku kibuga Emirates Stadium mu ijoro ryo ku wa Gatanu.

‎Iyi kipe itozwa na Mikel Arteta yashakaga kwereka andi makipe ko ifite ubushobozi bwo kugumana igikombe iheruka kwegukana nyuma y’imyaka 22. 

‎Uyu mukino waranzwe no kwiharira umupira ku ruhande rw’abanyamujyi ba Londres batigeze bahura n'akazi gakomeye.

‎Kai Havertz yafunguye amazamu ku munota wa 15 ku mupira mwiza yahawe na Riccardo Calafiori mbere y’uko Bukayo Saka ashyiramo igitego cya kabiri nyuma y’iminota umunani. 

‎Iki gitego cya Saka cyaturutse ku mupira wari ugaruwe n'umunyezamu Carl Rushworth ku mupira wari utewe n’umukinnyi mushya Christos Tzolis.

‎ Kapiteni Martin Ødegaard yashyizemo igitego cya gatatu ku munota wa 49 w’umukino ku mupira yahawe na Ben White.

‎Rutahizamu Christos Tzolis wakinaga umukino we wa mbere muri Premier League yagoye cyane ba myugariro ba Coventry City ndetse anagira uruhare rukomeye mu bitego bibiri bya mbere.

‎Arsenal yakinnye uyu mukino idafite Bruno Guimarães na William Saliba bafite imvune, mu gihe Viktor Gyökeres we yabanje ku ntebe y’abasimbura.

‎Ku rundi ruhande, Coventry City itozwa na Frank Lampard yari yongeye gukina umukino wa mbere muri Premier League kuva mu 2001, yagowe no guhangana n’urwego rw’umukino wa Arsenal. 

‎Nubwo Lampard yari yabanje mu kibuga abakinnyi bashya batanu barimo Caleb Yirenkyi waguzwe akayabo ka miliyoni 23 z'ama-pound, iyi kipe yashoje umukino iteye ishoti rimwe gusa rigana mu izamu.

‎Arsenal izakurikizaho umukino uzayihuza na Aston Villa mu gihe Coventry City izabanza gukina na Plymouth Argyle muri Carabao Cup mbere yo kwakira Hull City muri shampiyona.