Trump yakiriye umusore w’imyaka 16 watabaye umwana wari ugiye kurohama

Perezida wa Leta Zunze Ubumwe za Amerika, Donald Trump, yakiriye mu Biro by’Umukuru w’Igihugu umusore w’imyaka 16, Ryder Williams, wamamaye nyuma yo gutabara umwana w’imyaka 10 wari ugiye kurohama mu nyanja ya California.

Williams, wari ushinzwe kurinda aboga nk’umurinzi w’inyanja, yatabaye Nathaniel Rai ku wa 25 Nyakanga 2026, ubwo umwana yari yatwawe n’umuhengeri ukomeye ku mucanga wa Seabright Beach, muri Santa Cruz. Amashusho y’iki gikorwa yakwirakwiye ku mbuga nkoranyambaga, agaragaza Williams ahangana n’imiraba ikomeye kugira ngo akure umwana mu mazi.

Ku wa 17 Kanama 2026, Trump yakiriye Williams na Nathaniel Rai muri Oval Office, aho yashimiye uyu musore kubera ubutwari yagaragaje mu gutabara umwana. Perezida Trump yavuze ko igikorwa cya Williams cyari icy’indashyikirwa ndetse amwita intwari.

Mu gihe cyo gutabara, Williams yakomeje gufata umwana no kumurinda imiraba ikomeye kugeza ubwo undi murinzi w’inyanja, Aaron Bohnen, yabafashaga kugera ku nkombe bafite umutekano. Se wa Nathaniel na we yari ahari ubwo Trump yakiraga aba bana, ashimira Williams ku bwo kuba yararokoye ubuzima bw’umwana we.

Trump yari yaratangaje ko Williams azahabwa icyo yise “High Civilian Honor”, nk’ishimwe ry’umusivili wakoze igikorwa cy’ubutwari. Icyakora, amakuru avuga ko mu muhango wabereye muri White House hatagaragajwe neza ko iryo shimwe ryatanzwe nk’igihembo cyemewe ku mugaragaro.

Williams we yavuze ko icyo yakoze yagishingiye ku myitozo yahawe nk’umurinzi w’inyanja, ndetse ashimira bagenzi be bamufashije muri icyo gikorwa. Ubutwari bwe bwatumye inkuru ye ikwira cyane muri Leta Zunze Ubumwe za Amerika, ndetse bugera no kuri Perezida Trump.

KWIHANGANA Emmanuel/Radio Salus