Gor Mahia yageze ku mukino wa nyuma wa CECAFA Kagame Cup 2026 isezereye Al Hilal SC

Ikipe ya Gor Mahia yo muri Kenya yageze ku mukino wa nyuma wa CECAFA Kagame Cup 2026 nyuma yo gutsinda Al Hilal SC yo muri Sudani kuri penaliti 8-7, nyuma y'uko iminota 90 y'umukino yari yarangiye amakipe yombi anganya igitego 1-1.

Iyi ntsinzi yatumye Gor Mahia ikomeza ku mukino wa nyuma, aho itegereje kumenya ikipe bazahura iva hagati ya Rayon Sports yo mu Rwanda na Jamus FC yo muri Sudani y'Epfo, mu mukino wa nyuma uzakinwa ku wa Gatanu, tariki ya 7 Kanama 2026.

Ku mbuga nkoranyambaga, abafana ba Gor Mahia bishimiye intsinzi y'iyi kipe, mu gihe abakunzi ba Rayon Sports bavuga ko nibaramuka basezereye Jamus FC uzaba ari umukino ukomeye mu rugamba rwo kwegukana igikombe cya CECAFA Kagame Cup 2026.

KWIHANGANA Emmanuel/Radio Salus