Abategura Iserukiramuco Mpuzamahanga rya Ubumuntu Arts Festival batangaje ko imyiteguro y'iri serukiramuco yamaze kugera ku musozo, mu gihe riteganyijwe kuba ku nshuro ya 12 kuva tariki ya 13 kugeza ku ya 19 Nyakanga 2026.
Bavuga ko uyu mwaka iri serukiramuco rizongera guhuriza i Kigali abahanzi, abanditsi, abanyamuziki, ababyinnyi, abakina amakinamico n'abandi banyabugeni baturutse mu bihugu bitandukanye ku Isi, bagasangira ibihangano n'ubunararibonye.
Ibikorwa bizabera ku rwibutso rwa Jenoside rwa Kigali ku Gisozi, ndetse no mu bindi bibuga birimo Inzira Creative, Camp Kigali na MÖVENPICK Hotel.
Insanganyamatsiko y'uyu mwaka igira iti: "Embracing Time: Holding On. Holding Together," ikaba ishimangira akamaro ko kwihangana, gukomeza ubumwe no gufatanya mu kubaka ejo hazaza heza nubwo Isi ikomeje guhura n'ibibazo n'impinduka zitandukanye.
Ubumuntu Arts Festival ni iserukiramuco rimaze kuba urubuga ruhuza abanyabugeni bo mu Rwanda n'abo hirya no hino ku Isi, hagamijwe gukoresha ubuhanzi mu kwimakaza ubumuntu, amahoro n'ubwiyunge.
Ubumuntu Arts Festival yatangijwe mu 2015 na Hope Azeda, imaze kuba kimwe mu bikorwa by’umuco bikomeye mu Rwanda ndetse no ku ruhando mpuzamahanga, aho buri mwaka iba nyuma y’iminsi 100 yo Kwibuka Jenoside yakorewe Abatutsi mu 1994.
KWIHANGANA Emmanuel/Radio Salus
Ibitekerezo 0
Tanga igitekerezo
Nta bitekerezo bihari.