Mu ijoro ryo ku wa Gatandatu, tariki ya 4 Nyakanga 2026, Umuhanzi Itahiwacu Bruce, uzwi nka Bruce Melodie, yongeye kwigarurira abakunzi b'umuziki mu gitaramo cyasozaga ku mugaragaro ibitaramo bya Summer County Tour cyabereye kuri Stade Umuganda mu Karere ka Rubavu.
Iki ni igitaramo cya kane mu byateguwe na Bruce Melodie, yari yatumiyemo n'abandi bahanzi barimo The Ben, Bwiza na Kitoko, cyitabiriwe n'imbaga y'abakunzi b'umuziki.
Bruce Melodie yinjiye ku rubyiniro yambaye imyambaro isa n'iya gisirikare, yitwikiriye mu maso, aherekejwe n'ababyinnyi benshi. Mbere yo kwigaragaza neza, yakubise inshuro ebyiri ingoma (cymbals), ibintu byatumye abafana barushaho kugira amatsiko yo kumubona.
Akimara kugaragara, abafana bari bateraniye kuri Stade Umuganda bahise bamwakirana amashyi n'impundu, bamwe barangurura amajwi bati:
"Melodie! Melodie! Melodie!"
Mu gihe abandi basubizanyaga bati:
"001! 001! 001!"
Uyu muhanzi yatangije igitaramo cye aririmba "Selebura", indirimbo yahise ituma abafana binjira mu byishimo no kubyina.
Ageze hagati mu gitaramo, yazamuye ku rubyiniro Jay C Ambassadors, bafatanya kuririmba indirimbo "I Am Back", yakiriwe neza n'abari bitabiriye iki gitaramo.
Mu gusoza igitaramo, Bruce Melodie yanahamagaye ku rubyiniro umunyarwenya Pilate, uzwi nka "Minisitiri w'Amagendu", amushimira urukundo ahora amugaragariza no kumushyigikira.
Mu gihe kingana n'isaha imwe n'iminota 20 yamaze ku rubyiniro, Bruce Melodie yaririmbye indirimbo zigera kuri 14 zirimo "Ikinyafu", "Henzapu", "Ndakwanga", "Kungola", "Fou de Toi" n'izindi zakunzwe cyane.
Imyitwarire ye ku rubyiniro, uburyo yegereye abafana n'uko baririmbanaga indirimbo ze, byatumye igitaramo cye kiba kimwe mu byaranze isozwa rya Summer County Tour i Rubavu.
Aaron DUSHIMIMANA/Radio Salus
Ibitekerezo 0
Tanga igitekerezo
Nta bitekerezo bihari.