Kapiteni w'ikipe y'igihugu ya Portugal ndetse na Al Nassr yo muri Arabie Soudite, Cristiano Ronaldo yanditse amateka mashya mu gikombe cy'isi nyuma yo gufasha igihugu cye kunyagira Uzbekistan ibitego 5-0 mu mukino yatsinzemo ibitego bibiri.
Muri uyu mukino Ronaldo yanditse amateka akomeye mu mateka y'igikombe cy' isi kuva cyatangira gukinwa, aho yabaye umukinnyi rukumbi wabashije gutsinda igitego mu bikombe byisi 6 bitandukanye ni ukuvuga ko yabikoze mu gikombe cy' isi cya 2006, 2010, 2014, 2018, 2022 ndetse na 2026.
Si aka gahigo gusa yaciye dore ko Ronaldo yananditse amateka yo kuba umukinnyi wa kabiri ukuze watsinze igitego mu mikino y'igikombe cy' isi aho yabikoze ku myaka 41 n'iminsi 138 akaba aza inyuma y'umunya Cameroon Roger Milla wabikoze afite imyaka 42 n'iminsi 39 mu 1994.
Cristiano Ronaldo kandi yanditse amateka mu ikipe y'igihugu ya Portugal yo kuba umukinnyi wayitsindiye igitego ari muto akanabisubiramo akuze kurusha abandi. Aka gahigo agasangiye na Lionel Messi wabikoreye ikipe y'igihugu ya Argentina ndetse na Michael Laudrup wabikoreye ikipe y'igihugu ya Denmark.
Nyuma yo gutsinda ibitego 2 mu ijoro ryakeye, Cristiano Ronaldo yujuje ibitego 10 mu mikino y'igikombe cy'isi bimugira uwatsindiye ikipe y' Igihugu ya Portugal ibitego byinshi mu gikombe cy'isi kugeza ubu.
Kugeza ubu kandi Cristiano Ronaldo amaze gutsinda ibitego 975 mu rugendo rwe rwa ruhago birimo 145 yatsindiye ikipe y'igihugu ya Portugal, 450 yatsindiye Real Madrid, 145 yatsindiye Manchester united, 129 yatsindiye Al Nassr, 101 yatsindiye Juventus ndetse n'ibitego 5 yatsindiye Sporting Cp.
MUCYO Thiery/Radio Salus
Ibitekerezo 0
Tanga igitekerezo
Nta bitekerezo bihari.