Amavubi yitegura Mali yatangiye umwiherero

Abakinnyi b’ikipe y’igihugu y’URwanda “Amavubi” batangiye kugera mu mwiherero kuri uyu wa kane taliki 5 Ugushyingo 2026 bitegura igaruka ry’imikino yo gushaka itike y’igikombe cy’Afurika cya 2027 kigomba kubera muri Uganda, Tanzania na Kenya.

Amavubi ageze mu mwiherero mu rwego rwo kwitegura imikino  ibiri afitanye na Mali taliki 13 na taliki 17 Ugushyingo 2026 ikanaba imikino y’umunsi wa gatatu n’umunsi wa kane w’imikino y’amatsinda yo gushaka itike y’igikombe cy’Afurika cya 2027.

Umukino ubanza uzabera I Bamako muri Mali taliki 13 Ugushyingo 2026 mugihe umukino wo kwishyura uzabera I Kigali mu Rwanda taliki 17 Ugushyingo 2026.

Mu bageze muri uyu mwiherero ku ikubitiro harimo umunyezamu NTWARI Fiacre, BYIRINGIRO Jean Girbert, NSHUTI Innocent, UWUMUKIZA Obed, IRADUKUNDA Elie Tatou, MUGISHA Yves, NIYOMUGABO claude, MUHIRE Kevin ndetse na HAKIZIMANA Adolphe.

Ikipe y’igihugu y’urwanda “Amavubi” yatangiye neza urugendo rwo gushaka itike y’igikombe cy’Afurika cya 2027 dore ko yabashije gutsinda imikino ibiri yombi ibanza .

Ikipe y’igihugu y’URwanda ihanganiye na Mali umwanya wa mbere mu itsinda K dore ko zinganya amanota ndetse n’ibitego zizigamye.

Si amavubi makuru gusa kandi yatangiye umwiherero dore ko n’Amavubi yabatarengeje imyaka 23 nayo yatangiye umwiherero kuri uyu wa kane yitegura umukino ifitanye na Cameroon.

MUCYO Thierry/Radio Salus