Mbappé yishimiye intsinzi ya Real Madrid muri El Clásico

Rutahizamu w’Umufaransa, Kylian Mbappé, ukinira Real Madrid, yavuze ko intsinzi y’ibitego 2-1 batsindiye mukeba wabo FC Barcelona kuri Stade ya Camp Nou ku Cyumweru, tariki ya 25 Ukwakira 2026, ari umusaruro w’ikipe yose muri rusange.

Ibi yabigarutseho mu kiganiro yagiranye n’umuyoboro wa YouTube wa Real Madrid, aho yavuze ko ikipe yiteguye neza uyu mukino kandi ko batanze byose kugira ngo itsinde.

Mbappé yagize ati: “Ni intsinzi y’ikipe. Twiteguye neza mu mikino mike iheruka kubera ko twatsinze kandi twakinnye neza. Twaje dufite intekerezo nziza kandi uyu munsi twatanze byose.”

Iyi ntsinzi yafashije Real Madrid kugabanya ikinyuranyo cy’amanota yarushwaga na FC Barcelona, ava kuri atandatu agera kuri atatu. Nyuma y’umunsi wa 10 wa shampiyona y’icyiciro cya mbere muri Espagne, Real Madrid iri ku mwanya wa gatatu n’amanota 24, ikurikiye Atlético Madrid ifite amanota 25, mu gihe FC Barcelona iyoboye urutonde n’amanota 27.

Muri uyu mukino, Mbappé yatsinze ibitego bibiri, anuzuza ibitego 100 mu mikino 116 amaze gukinira Real Madrid, aho yanatanze imipira 15 yavuyemo ibindi bitego.

Uyu rutahizamu kandi amaze gutsinda ibitego umunani mu mikino irindwi ya El Clásico, ndetse akaba amaze gutsinda FC Barcelona ibitego 14 mu mikino 11 yayihuriyemo na yo mu marushanwa atandukanye.

SHYAKA Bienvenue/Radio Salus