Real Madrid yatsinze FC Barcelona muri El Clásico, Mbappé atsinda ibitego bibiri

Real Madrid yatsinze mukeba wayo FC Barcelona ibitego 2-1 mu mukino w’umunsi wa 10 wa shampiyona y’icyiciro cya mbere muri Espagne, La Liga.

Ibitego bibiri bya Real Madrid byatsinzwe na Kylian Mbappé, mu gihe igitego kimwe cya FC Barcelona cyatsinzwe na Raphinha.

Uyu mukino wari utegerejwe n’abakunzi b’umupira w’amaguru hirya no hino ku isi, wabaye ku Cyumweru, tariki ya 25 Ukwakira 2026, saa yine z’ijoro, kuri Stade ya Camp Nou, FC Barcelona isanzwe yakiriraho imikino yayo.

Uyu mukino wabaye mwiza kuri Mbappé, rutahizamu wa Real Madrid n’ikipe y’igihugu y’u Bufaransa kuko wasize kugeza ubu, amaze gutsindira Real Madrid ibitego 100, anatanga imipira 15 yavuyemo ibindi bitego mu mikino 116 amaze kuyikinira. Yatangajwe nk’umukinnyi mushya wa Real Madrid ku wa 3 Kamena 2024, avuye muri Paris Saint-Germain yo mu Bufaransa.

Mbappé kandi amaze gutsinda ibitego umunani mu mikino irindwi ya El Clásico, ndetse akaba amaze gutsinda FC Barcelona ibitego 14 mu mikino 11 yayihuriyemo na yo mu marushanwa atandukanye.

Mu mikino 591 amaze gukina mu marushanwa atandukanye, Mbappé amaze gutsinda ibitego 450 anatanga imipira 158 yavuyemo ibindi bitego, haba mu makipe yakiniye ndetse no mu ikipe y’igihugu y’u Bufaransa.

Nyuma y’umunsi wa 10 wa La Liga, FC Barcelona yagumye ku mwanya wa mbere n’amanota 27. Atlético Madrid iri ku mwanya wa kabiri n’amanota 25, mu gihe Real Madrid yageze ku mwanya wa gatatu n’amanota 24.



SHYAKA Bienvenue/Radio Salus