Kaminuza ya Kigali yegukanye igihembo cy’ubwiza mu gutanga raporo z’imari

Kaminuza ya Kigali (UoK) yegukanye igihembo cy’ishami ry’uburezi mu bihembo bya kane by’Ubwiza mu Gutanga Raporo z’Imari n’Imikorere Myiza, bizwi nka Financial Reporting and Excellence Awards 2026.

Iki gihembo cyatanzwe kuri uyu wa Gatanu taliki 4 Ukwakira 2026 mu birori byabereye kuri Paramount Hotel iherereye mu mujyi wa Kigali, byateguwe n’Ikigo cy’Abacungamari b’Umwuga bemewe mu Rwanda (ICPAR).

Igihembo cyashyikirijwe Umuyobozi Mukuru ushinzwe Imari muri Kaminuza ya Kigali, CPA Edwin Mungai Waithaka.

Ibirori by’uyu mwaka byari bifite insanganyamatsiko igira iti: “Guteza imbere gukorera mu mucyo no gukomeza kuramba mu gutanga raporo z’imari hagamijwe iterambere ririmo bose.”

Umuyobozi Mukuru wa Kaminuza ya Kigali, Prof. George Kimathi, yavuze ko iki gihembo kigaragaza ubushake bwa kaminuza bwo gukorera mu mucyo, gukoresha neza umutungo w’imari no guteza imbere imikorere myiza y’ikigo.

Waithaka yavuze ko iki gihembo ari ikimenyetso cy’imbaraga kaminuza ikomeje gushyira mu micungire myiza y’imari, gukurikiza amahame yo gutanga raporo z’imari, kugenzura imikoreshereze y’umutungo no guteza imbere imiyoborere y’imari.

Ibi bihembo bitangwa buri mwaka hagamijwe gushimira ibigo byo mu nzego zitandukanye bigaragaza ubuhanga mu gutanga raporo z’imari, gukorera mu mucyo, imiyoborere myiza ndetse n’imikorere irambye.

Iki gihembo kije mu gihe Kaminuza ya Kigali ikomeje guteza imbere Ishuri ryayo ry’Amasomo y’Umwuga n’Amasomo y’Abayobozi, ndetse ikagura amahirwe y’amasomo ku banyeshuri n’abakozi bashaka gukomeza kwiga.

NZAYISENGA Marie Rose/Radio Salus