Amavubi yatsinze Cape Verde 2-1

Ikipe y’Igihugu y’u Rwanda, Amavubi, yatsinze Cap-Vert ibitego 2-1 mu mukino wo gushaka itike y’Igikombe cya Afurika cya 2027, bityo ikomeza kuyobora Itsinda K n’amanota atandatu kuri atandatu.

Uyu mukino wabereye muri Cap-Vert, aho Amavubi yagaragaje ubushobozi bwo gukura amanota atatu imbere y’abafana b’ikipe yari yakiriye umukino.

Cap-Vert ni yo yafunguye amazamu, igitego cyatsinzwe na Gilson Benchimol Tavares. Amavubi ariko ntiyatinze kwishyura, kuko Niyomugabo Claude yatsinze igitego cyatumye amakipe yombi ajya kuruhuka anganya 1-1.

Mu gice cya kabiri, Amavubi yakomeje gusatira izamu rya Cap-Vert maze ku munota wa 56, Iradukunda Elie Tatou atsinda igitego cya kabiri cy’u Rwanda ku mupira wahinduwe na Joy-Lance Mickels.

Nyuma y’icyo gitego, Amavubi yashoboye gukomeza kubungabunga umusaruro wayo kugeza umukino urangiye, atsindira Cap-Vert iwayo ibitego 2-1.

Gutsinda uyu mukino byatumye Amavubi agira amanota atandatu kuri atandatu, akomeza kuyobora Itsinda K mu gushaka itike ya CAN 2027.

Umukinnyi w’Amavubi, Mugisha Bonheur, ntazakina umukino utaha u Rwanda ruzahuramo na Mali, nyuma yo kubona ikarita ya kabiri y’umuhondo.

Mugisha yari yarabonye ikarita y’umuhondo mu mukino u Rwanda rwatsinzemo Liberia, yongera kuyibona mu mukino wa Cap-Vert, bityo akaba azasiba umukino ukurikiraho.

Amavubi azasubira mu kibuga mu Ugushyingo 2026, aho azahura na Mali mu mikino ibiri.

Muri iri Tsinda K, Mali irakira Liberia saa tatu.

KWIHANGANA Emmanuel/Radio Salus