Ernan Siluane wa APR FC yafashije ikipe y'igihugu ya Mozambique kunganya na Sénégal

Umunyezamu wa APR FC, Ernan Siluane, yitwaye neza ubwo Mozambique yanganyaga na Sénégal igitego 1-1 mu mukino wo gushaka itike y’Igikombe cya Afurika cya 2027.

Uyu mukino wo mu Itsinda J wabereye kuri Zimpeto Stadium ku wa Gatanu, tariki ya 25 Nzeri 2026. Siluane yabanje mu kibuga, ndetse agaragaza ubuhanga budasanzwe mu izamu kuva umukino ugitangira kugeza urangiye.
Ku munota wa kabiri, uyu munyezamu yakuyemo ishoti rya Assane Diao, mu gihe ku munota wa 16 yongeye kurokora Mozambique akuramo igitego cyabazwe ubwo yahagarikaga umupira wari utewe na Abdallah Sima.

Sénégal yafunguye amazamu ku munota wa 31, ubwo Nicolas Jackson yatsindaga igitego nyuma yo guhabwa umupira na Abdallah Sima. Mozambique ntiyacitse intege, kuko Geny Catamo yaje kuyitsindira igitego cyo kwishyura ku munota wa 47.

Siluane yakuyemo amashoti ane muri atanu yatewe yaganaga mu izamu rye, afasha Mozambique kubona inota rimwe muri uyu mukino.

Muri APR FC, aracyategereje kongera kubona umwanya wo gukina dore ko kuva yagirira imvune mu mukino ikipe ye yatsinzwemo na Gor Mahia ibitego 5-0 muri CECAFA Kagame Cup atarongera gukinishwa.
Mozambique izongera kugaruka mu kibuga ku wa Kabiri, tariki ya 29 Nzeri 2026, ubwo izakira Sudani mu mukino wa kabiri wo gushaka itike y’Igikombe cya Afurika cya 2027.

NSENGIMANA Jean Bosco/Radio Salus