Huye: Depite Kanyange na Senateri Ngarambe baganirije abanyeshuri ba Kaminuza y’u Rwanda kuri demokarasi

Intumwa za rubanda zirimo Depite Kanyange Phoibe na Senateri Onesphore Ngarambe, bagize Inteko Ishinga Amategeko, baganirije abanyeshuri ba Kaminuza y’u Rwanda ku ruhare rw’urubyiruko muri demokarasi, mu bikorwa byo kwizihiza Umunsi Mpuzamahanga wa Demokarasi.

Ibi biganiro byabaye kuri uyu wa kabiri taliki 15 Nzeri 2026, bibera muri kaminuza y’u Rwanda ishami rya Huye no mu zindi kaminuza zitandukanye zo mu Rwanda, bigamije guhugura abanyeshuri no kubagezaho ubumenyi bw’ibanze kuri demokarasi. Byari bifite insanganyamatsiko igira iti: “Uruhare rw’urubyiruko muri demokarasi y’ubwumvikane n’ibitekerezo bya politiki binyuranye.”

Agaruka ku ruhare rw’ubuyobozi mu gushyira demokarasi mu bikorwa, Senateri Onesphore Ngarambe yasabye abanyeshuri bitabiriye ibi biganiro gushyira imbaraga mu byo biga, ashimangira ko kumenya no gushyira mu bikorwa demokarasi bidashingira ku byo umuntu yize gusa.

Yagize ati: “Uko turi mu Nteko Ishinga Amategeko twese si ko twize ibigendanye n’ubuyobozi, kuko ushobora kurangiza kwiga ibyo wiga byose ariko ukaba umuyobozi. Ni yo mpamvu kumenya demokarasi bitagombera ibyo wize.”

Muri ibi biganiro kandi, hagarutswe ku bijyanye no gusaranganya ubutegetsi, hifashishijwe inyigisho zijyanye n’imitwe ya politiki iri mu Rwanda n’uburyo isangira ubutegetsi, buri mutwe ukagira ijambo mu butegetsi, nta wubangamiye undi, kandi bigakorwa mu mucyo.

Ku ruhande rwe, Depite Kanyange Phoibe yasangije abanyeshuri uko u Rwanda rwateye imbere rukoresheje gusangira demokarasi, ashimangira ko mu Rwanda habarizwa imitwe ya politiki 11 ikora neza mu bwumvikane no mu bwuzuzanye.
Yagize ati: “Twebwe mu Rwanda twahisemo gusenyera umugozi umwe mu kubaka demokarasi nziza no guteza igihugu imbere.”

Depite Kanyange yasabye kandi urubyiruko kugira uruhare mu kubaka demokarasi nziza, binyuze mu kwitabira amatora, gutanga ibitekerezo byubaka, kurwanya amacakubiri, kurinda ibyagezweho, kuba abayobozi n’abafatanyabikorwa mu miyoborere, ndetse no kugira uruhare mu bindi bikorwa bigamije guteza imbere demokarasi.

NIYOMUKIZA Gratien/Radio Salus