MTV yakuyeho icyiciro cya ‘Best Afrobeats’ muri VMA

Abategura ibihembo bya MTV Video Music Awards (VMA) bakuye ku rutonde rw’ibyiciro bizahatana muri 2026 icyiciro cya ‘Best Afrobeats’, cyari cyashyizweho bwa mbere mu 2023. Iki cyiciro cyari cyarahaye umwanya wihariye abahanzi bakora umuziki wa Afrobeats mu bihembo bikomeye mpuzamahanga.

Icyemezo cyo kugikuraho cyagaragaye ku rutonde rw’abahatanira ibihembo bya MTV VMA 2026 rwasohotse ku wa 18 Kanama 2026. Muri uyu mwaka, MTV yanakuyeho n’ibindi byiciro byari bisanzweho, birimo ‘Best Rock’, mu gihe hari ibyiciro byagaruwe cyangwa byahinduwe mu rwego rwo kuvugurura gahunda y’ibihembo.

Nubwo icyiciro cya ‘Best Afrobeats’ kitakigaragara, abahanzi bakora iyi njyana baracyashobora guhatanira ibihembo mu bindi byiciro, bitewe n’indirimbo cyangwa amashusho yabo.

‘Best Afrobeats’ yari yatangijwe mu 2023, aho Rema na Selena Gomez babaye aba mbere begukana iki gihembo, kubera indirimbo yabo ‘Calm Down’.

Mu 2024, Tyla yegukanye iki cyiciro kubera indirimbo ye ‘Water’, naho mu 2025 yongeye kucyegukana kubera ‘Push 2 Start’, bityo aba umuhanzi umaze kugitsindamo inshuro nyinshi.

Ibi bibaye mu gihe MTV iri kuvugurura ibyiciro bya VMA, mu rwego rwo gukomeza guhuza ibihembo n’imigendekere y’umuziki mpuzamahanga. Ibihembo bya MTV VMA 2026 biteganyijwe kubera i Los Angeles ku wa 27 Nzeri 2026.

KWIHANGANA Emmanuel/Radio Salus