Benshi mu bagana Umujyi wa Huye bavuga ko n’ubwo bazi akamaro ko gukoresha agakingirizo mu kwirinda, bahura n’imbogamizi yo guhendwa n’abacuruzi bitwaza ko bwije, bakazamura ibiciro uko bishakiye.
Nsengiyumva Jean Bosco, umuturage utuye muri uyu mujyi, yavuze ko aherutse guhura n’ikibazo cyo gushaka agakingirizo mu masaha akuze agacibwa akayabo, ibintu abona ko byatuma hari abishora mu mibonano mpuzabitsina idakingiye kubera kubura ubwo bushobozi.
Yagize ati “Nari napanze guhura n’umukunzi wanjye, aza gukererwa ahagera bwije. Kubera ko twari dukumburanye kandi dukeneye kwirinda, nagiye mu mujyi gushaka agakingirizo, bambwira ko kagura 2000 Frw, ahandi banyaka 1500 Frw. Kubera ko nta kundi nari kubigenza narayatanze.”
Si uyu gusa, kuko na bagenzi be bemeza ko babimenyereye ko iyo ugiye kugura agakingirizo mu Mujyi wa Huye nijoro, wishyura amafaranga y’umurengera ugereranyije n’igiciro gisanzwe ku manywa.
Mu gusubiza kuri izi mpungenge, Umuyobozi ushinzwe Igenamigambi ry’Abaturage Bafite Ibyago Bikabije byo Kwandura virus itera SIDA mu Kigo cy’Igihugu gishinzwe Ubuzima (RBC), Dr. Nzeyimana Zephanie, yasobanuye ko impamvu z’iryo zamuka zishobora kuba zishingiye ku masaha y’akazi k’abacuruzi bakora nijoro.
Yagize ati “Umuntu ashobora gucibwa amafaranga menshi bitewe n’amasaha akaguriye, kubera ko hari abacuruzi bakora amasaha yose bityo nyuma bakongera amafaranga mu masaha ya nijoro. Umuntu wese niba azi ko aza gukenera agakingirizo, akwiye kubitegura akakagura hakiri kare.”
Dr. Nzeyimana kandi yagaragaje ko ikibazo atari ubuke bw’udukingirizo kuko imibare ya RBC yerekana ko buri mwaka mu Rwanda hinjira nibura udukingirizo dusaga miliyoni 30 tw’amoko atandukanye, muri gahunda yo gukumira no kurwanya ubwandu bushya bwa virusi itera SIDA.
Yibukije ko hari ahantu hashyizweho hatangirwa udukingirizo tw’ubuntu nko ku Kigo Nderabuzima cya Tumba (ku Mukoni) ndetse no mu bigo by’urubyiruko.
Icyakora yemeye ko hari imbogamizi z’abakozi bake mu gutanga iyo serivisi, ariko yizeza ko bigiye gukosorwa vuba kugira ngo serivisi zirusheho kunozwa.
HANYURWIMFURA Olivier/TheKaminuzaStar
Comments 67
Leave a Comment