Umukinnyi wo hagati w'ikipe y'igihugu ya Afurika y'Epfo ndetse na Mamelodi Sundowns, Jayden Adams, yitabye Imana afite imyaka 25, nyuma y'iminsi mike agarutse avuye mu Gikombe cy'Isi cya 2026.
Adams yari umwe mu bakinnyi bagize uruhare mu rugendo rw'amateka rwa Afurika y'Epfo muri iri rushanwa, aho yakinnye imikino yose y'amatsinda mbere y'uko ikipe ye isezererwa na Canada muri 1/16 cy'irangiza.
Minisitiri wa Siporo, Ubuhanzi n'Umuco muri Afurika y'Epfo, Gayton McKenzie, yavuze ko urupfu rwa Adams ari igihombo gikomeye ku mupira w'amaguru w'igihugu.
Yagize ati: " igihugu cyabuze umwe mu bakinnyi bato bari bafite impano idasanzwe, anihanganisha umuryango wa nyakwigendera, bagenzi be bakinana n'abafana bamushyigikiye mu rugendo rwe."
Polisi ya Afurika y'Epfo yatangaje ko yatangiye iperereza nyuma y'uko umurambo wa Adams ubonetse mu rugo ruri mu gace ka Schotschekloof mu Mujyi wa Cape Town. Kugeza ubu, icyateye urupfu rwe ntikiratangazwa ku mugaragaro, iperereza rikaba rigikomeje.
Jayden Adams yatangiye kumenyekana akinira Stellenbosch FC mbere yo kwerekeza muri Mamelodi Sundowns muri Mutarama 2025, aho yafashije iyi kipe kwegukana ibikombe bitandukanye birimo shampiyona ndetse n'Igikombe cya Afurika cy'amakipe yabaye aya mbere iwayo.
Yanagize uruhare mu ikipe ya Afurika y'Epfo yageze muri kimwe cya kabiri cy'Igikombe cya Afurika cya 2023, mbere yo guhamagarwa mu ikipe yitabiriye Igikombe cy'Isi cya 2026. Muri iri rushanwa, yafashije igihugu cye kwandika amateka yo kurenga amatsinda bwa mbere.
Perezida wa FIFA, Gianni Infantino, yihanganishije umuryango wa nyakwigendera n'abagize umuryango mugari w'umupira w'amaguru, avuga ko urupfu rwa Adams rubabaje cyane kandi ko azahora yibukirwa ku ruhare yagize muri siporo.
BYIRINGIRO Arsene/Radio Salus
Ibitekerezo 0
Tanga igitekerezo
Nta bitekerezo bihari.