Brazil yatunguwe isezererwa mu Gikombe cy'Isi, Norway ikomeza muri ¼

Ikipe y'igihugu ya Brazil yasezerewe muri 1/8 cy'irangiza cy'Igikombe cy'Isi cya 2026, nyuma yo gutsindwa na Norway ibitego 2-1 mu mukino wabereye kuri MetLife Stadium mu ijoro ryo ku wa 5 Nyakanga 2026.

Brazil yatangiye umukino isatira cyane, ndetse inabona penaliti hakiri kare nyuma y'ikosa ryakorewe rutahizamu Matheus Cunha. Icyakora, Bruno Guimarães yananiwe kuyibyaza umusaruro, ayitera hanze.

Norway yahise yifashisha amahirwe yabonye, aho rutahizamu Erling Haaland yatsinze ibitego bibiri byafashije ikipe ye kubona intsinzi n'itike ya ¼ cy'irangiza.

Igitego rukumbi cya Brazil cyatsinzwe na Neymar kuri penaliti mu minota y'inyongera, ariko nticyari gihagije ngo kiyifashe gukomeza mu cyiciro gikurikira.

Ibitego bibiri bya Haaland byatumye yuzuza ibitego birindwi muri iri Gikombe cy'Isi, anganya na Lionel Messi na Kylian Mbappé ku rutonde rw'abamaze gutsinda ibitego byinshi muri iri rushanwa.

Iyi ntsinzi yakomeje amateka meza ya Norway imbere ya Brazil, kuko iyi kipe yo mu Majyaruguru y'u Burayi ikomeje urugendo rwo kudatsindwa na Brazil mu mateka y'imikino yahuje impande zombi.

Ku ruhande rwa Brazil, ni ubwa mbere kuva mu 1990 isezerewe itarenze icyiciro cya 1/8 cy'Igikombe cy'Isi. Ku ruhande rwa Norway, ni bwo bwa mbere igeze muri ¼ cy'irangiza cy'iri rushanwa.

Mu wundi mukino wabaye muri iki cyiciro, Ubwongereza bwatsinze Mexique ibitego 3-2, bubona itike ya ¼ cy'irangiza.

Biteganyijwe ko Norway izahura n'Ubwongereza muri ¼ cy'irangiza, mu mukino utegerejwe na benshi.

MUCYO Thierry/Radio Salus