Umuhanzi Mugisha Benjamin, uzwi cyane nka The Ben, yasoje igitaramo cya Summer County Tour cyabereye mu Karere ka Rubavu ku wa Gatandatu, tariki ya 4 Nyakanga 2026, ashimirwa n'abafana ndetse anatungurwa n'impano y'ifoto y'umukobwa we, Icyeza Mugisha Luna Paris.
Mbere yo kujya ku rubyiniro, The Ben yabanje gusenga ari kumwe n'ababyinnyi be, asaba umugisha ku gitaramo bagombaga gukora. Iki gikorwa cyashimwe na bamwe mu bitabiriye igitaramo, bagaragaza ko bishimiye uburyo ashyira Imana imbere.
The Ben yaserutse ku rubyiniro yambaye ikote ry'umukara, ishati y'umweru n'ipantaro ya jeans, aherekejwe n'ababyinnyi be. Yinjiye aririmba indirimbo "Si Beza" ya Tom Close, nk'uko yari yabigenje no mu gitaramo cyabereye mu Karere ka Bugesera.
Mu gihe yamaze ku rubyiniro, yaririmbye zimwe mu ndirimbo zakunzwe zirimo "I Am in Love", "Ntacyadutanya", "Ndaje", "Ko Nahindutse", "Folomiana", "Indabo Zanjye", n'izindi zatumye abafana baririmbana na we kuva ku ntangiriro kugeza ku musozo.
Mu gusoza igitaramo cye, yaririmbye indirimbo "Thank You God" yakoranye na Tom Close, yakiriwe neza n'abari bitabiriye igitaramo.
Akimara kuva ku rubyiniro, bamwe mu bafana be b'i Rubavu bamutunguye bamuha impano y'ifoto y'umukobwa we, Icyeza Mugisha Luna Paris, mu rwego rwo kumugaragariza urukundo no kugaragaza ko bamwishimira yaba we ndetse n'umuryango we.
Iyi mpano yakoze ku mutima The Ben, agaragaza ibyishimo n'amarangamutima y'ishimwe imbere y'abafana.
The Ben akomeje kuba umwe mu bahanzi bafite abakunzi benshi mu Rwanda, aho ibikorwa bye bikomeza kwitabirwa n'ingeri zitandukanye z'abafana.
Aaron DUSHIMIMANA/Radio Salus
Ibitekerezo 0
Tanga igitekerezo
Nta bitekerezo bihari.