Harry Kane na Alexia Putellas begukanye Ballon d’Or ya 2026

Umwongereza Harry Kane yegukanye igihembo cya Ballon d’Or 2026 mu bagabo, mu gihe Umunya-Espagne Alexia Putellas yacyegukanye mu bagore, ku nshuro ya gatatu nyuma y’izo mu 2021 na 2022.

Umutoza w'ikipe y'igihugu ya Esipanye, Luis de la Fuente yegukanye igihembo cy’umutoza mwiza w’umwaka mu bihembo bya Ballon d’Or 2026.

Uyu mutoza yegukanye UEFA Euro 2024 ndetse n’igikombe cy’Isi cya 2026, aho yatsinze ikipe y’igihugu ya Arijantine ku mukino wa nyuma. Igitego cyatsinzwe na Ferran Torres mu minota 30 y’inyongera, nyuma y’uko iminota 90 isanzwe irangiye amakipe anganya ubusa ku busa.

Rutahizamu wa FC Barcelona n’ikipe y’igihugu ya Espagne, Lamine Yamal, yegukanye igihembo cy’umukinnyi mwiza ukiri muto mu bihembo bya Ballon d’Or 2026. Ni inshuro ya gatatu yikurikiranya agihabwa, nyuma y’icyo yahawe mu 2024 na 2025.

Unai Simón, usanzwe akinira ikipe y’igihugu ya Espagne na Athletic de Bilbao, yegukanye igihembo cy’umuzamu mwiza w’umwaka wa 2026.

Rutahizamu wa Arsenal n’ikipe y’igihugu y’u Bwongereza, Bukayo Saka, yahawe igihembo cy’umukinnyi wakoze ibikorwa byo gufasha abandi.

Ikipe ya Paris Saint-Germain yo mu Bufaransa yatowe nk’ikipe y’umwaka mu bagabo mu bihembo bya Ballon d’Or 2026, mu gihe mu bagore iki gihembo cyegukanywe na Barça Femení yo muri Espagne.

Harry Kane, rutahizamu wa FC Bayern München yo mu Budage n’ikipe y’igihugu y’u Bwongereza, yegukanye igihembo cya rutahizamu mwiza w’umwaka wa 2026 mu bagabo. Mu gushimira, yashimiye abakinnyi bakinana muri Bayern München no mu ikipe y’igihugu y’u Bwongereza bamufashije kwegukana iki gihembo.

Mu bagore, Umunya-Mexique Charlyn Corral, ukinira Pachuca Femenil yo mu gihugu cye, ni we wahembwe nk’uwahize abandi muri iki cyiciro.

Harry Kane abaye Umwongereza wa mbere mu myaka 25 wegukanye Ballon d’Or, kuko uwaherukaga kuyitwara yari Michael Owen mu 2001, ubwo yakinaga muri Liverpool FC.

Abandi bakinnyi bakomoka mu Bwongereza begukanye Ballon d’Or ni Sir Stanley Matthews mu 1956, ubwo yakinaga muri Blackpool; Sir Bobby Charlton mu 1966, wakiniraga Manchester United; na Kevin Keegan, wayegukanye mu 1978 no mu 1979, ubwo yakinaga muri Hamburger SV.

Mu mwaka w’imikino wa 2025/2026, Harry Kane yatsinze ibitego 73, anatanga imipira umunani yavuyemo ibindi bitego mu mikino 64 yakiniye FC Bayern München n’ikipe y’igihugu y’u Bwongereza.

SHYAKA Bienvenue /Radio Salus