HUYE: Abanyeshuri ba Kaminuza y'u Rwanda bakanguriye abo muri G.S. HVP Gatagara gukemura amakimbirane binyuze mu butabera nsanasano

Mu gihe u Rwanda rukomeje guteza imbere ubutabera nsanasano (Alternative Dispute Resolution-ADR), abanyeshuri bibumbiye muri Appropriate Dispute Resolution (ADR) Club ya Kaminuza y'u Rwanda, Ishami rya Huye, batanze ibiganiro ku banyeshuri ba G.S. HVP Gatagara bigamije kubasobanurira uburyo bwo gukemura amakimbirane binyuze mu bwunzi, ubuhuza n'ubukemurampaka, bavuga ko ari imwe mu nzira zubaka umuco w'amahoro no kugabanya imanza zijyanwa mu nkiko.

Ibi biganiro byabereye mu kigo cya G.S. HVP Gatagara giherereye mu Karere ka Huye, aho abanyeshuri ba ADR Club basobanuriye bagenzi babo akamaro k'ubutabera nsanasano n'uruhare rwabwo mu gukemura amakimbirane mu bwumvikane, bitabaye ngombwa kwihutira kwitabaza inkiko.

Bamwe mu banyeshuri bitabiriye ibi biganiro bavuga ko byabafashije gusobanukirwa uburyo amakimbirane ashobora gukemurwa hagati y'abayafitanye, bityo bikazatuma barushaho kubana neza mu buzima bw'ishuri ndetse no hanze yaryo.

Uwingabire Immaculée yavuze ko amasomo bahawe azabafasha gukemura ibibazo mu bwumvikane no gusangiza ubumenyi bagenzi babo ndetse n'imiryango yabo.

“Amasomo twakuye mu kiganiro cy'uyu munsi azajya adufasha kubana neza na bagenzi bacu ndetse na sosiyete muri rusange. Azadufasha kandi kwigisha ababyeyi bacu n'abagenzi bacu uburyo bakwikemurira ibibazo badahise babijyana mu nkiko zo hejuru, ahubwo bakabanza kubikemura bo ubwabo.”

Akomeza avuga ko ubu asanga hari ibibazo byoroheje abanyeshuri bashoboraga kujya bikemurira ubwabo aho kubyihutira kubigeza ku buyobozi.

“Iki kiganiro kigiye kudufasha kubana neza. Hari utubazo twajyaga tugirana hagati yacu, nk'aho umuntu apfuye igikoresho cya mugenzi we, ugasanga ahise yirukira ubuyobozi bw'ikigo. Ubu tugiye kujya tubyikemurira hagati yacu.”

Na Nisingizwe Remy yavuze ko aya masomo azabafasha mu mibereho ya buri munsi, cyane cyane mu gukemura ibibazo byoroheje bitabaye ngombwa ko bihita bishyikirizwa ubuyobozi.

“Iki kiganiro kidusigiye byinshi. Kizadufasha gukemura ibibazo bitandukanye tujya tugira mu ishuri. Mbere twahitaga tubijyana ku buyobozi, ariko ubu tuzajya tubanza kubyikemurira.”

Umuyobozi wa Appropriate Dispute Resolution Club muri Kaminuza y'u Rwanda, Ishami rya Huye, akaba n'umuhuzabikorwa w'izi club ku rwego rw'amakaminuza, Denys NDIHOREYE, yavuze ko gukangurira abaturage, by'umwihariko urubyiruko, kumenya ubutabera nsanasano ari imwe mu ntego bihaye.

“Imwe muri mission dufite ni uko iyi policy y'ubutabera nsanasano mu Rwanda Abanyarwanda bayumva nk'uburyo bushoboka bubafasha kubana mu mahoro, nk'uburyo budahenze kandi budatwara igihe umuntu asiragira mu nkiko.”

Denys yavuze kandi ko nk'abanyeshuri ba Kaminuza y'u Rwanda bafite inshingano zo kuba ba ambasaderi b'ubu buryo, bakabugeza no ku banyeshuri bo mu mashuri yisumbuye kugira ngo bakure bumva ko amakimbirane menshi ashobora gukemurwa mu bwumvikane.

“Nk'abanyeshuri ba Kaminuza bisobanuye ko turi abambasaderi n'intumwa z'ubu buryo. Kubizana hano ni ukugira ngo abanyeshuri na bo bige gukemura ibibazo bahura na byo hagati yabo kandi bakure bumva ko bashobora kubikemura mu bwumvikane.”

Ku ruhande rw'ubuyobozi bw'ishuri, Muhimbaza Augustin, Umuyobozi wungirije ushinzwe imyitwarire muri G.S. HVP Gatagara, yavuze ko ibi biganiro bizafasha abanyeshuri guhindura uburyo bakemuraga amakimbirane.

“Twakiriye neza aba banyeshuri ba Kaminuza y'u Rwanda. Ibi biganiro bizafasha abanyeshuri kumenya ko bashobora kwikemurira ibibazo bitabaye ngombwa ko bihita bigera ku buyobozi cyangwa ngo basabire bagenzi babo ibihano. Bizabafasha kubaka umuco wo kuganira no kwiyunga.”

Mu Rwanda, ubutabera nsanasano bukomeje gutezwa imbere nk'imwe mu nzira zifasha gukemura amakimbirane mu bwumvikane, mu buryo bwihuse kandi budahenze, bukagabanya n'ubucucike bw'imanza mu nkiko. Ni muri urwo rwego inzego z'ubutabera n'abafatanyabikorwa bazo bakomeje gushishikariza abaturage, by'umwihariko urubyiruko, gukoresha izi nzira igihe bishoboka.

KWIZERA Fiston/Radio Salus