Nelly Mukazayire arifuza ko Stade Amahoro yuzura mu mukino w’Amavubi na Liberia

Minisitiri wa Siporo, Nelly Mukazayire, yasabye abakunzi b’umupira w’amaguru mu Rwanda kwitabira ari benshi umukino w’Amavubi na Liberia, kugira ngo baze gushyigikira ikipe y’igihugu mu rugendo rwo gushaka itike y’Igikombe cya Afurika cya 2027.

Uyu mukino uraba kuri uyu wa Gatanu, tariki ya 25 Nzeri 2026, kuri Stade Amahoro i Remera, guhera saa kumi n’ebyiri z’umugoroba. Ni umukino wa mbere u Rwanda rukina muri aya majonjora, mu itsinda ririmo kandi Cape Verde na Mali.

Minisitiri Mukazayire yagaragaje ko yifuza kubona Stade Amahoro yuzuye abakunzi b’Amavubi, bakaba hafi y’ikipe y’igihugu muri uyu mukino ufatwa nk’intangiriro y’urugendo rwo gushaka itike ya CAN 2027.

Ibi bije bihura n’ubutumwa bwatanzwe n’umutoza w’Amavubi, Stephen Constantine, na bamwe mu bakinnyi, basabye Abanyarwanda kuzaza ari benshi. Constantine yavuze ko inkunga y’abafana ari ingenzi ku ikipe, mu gihe myugariro Mutsinzi Ange na we yavuze ko abakinnyi biteguye gushaka amanota atatu imbere y’abafana babo.

Amavubi ari kwitegura uyu mukino nyuma y’iminsi y’imyitozo n’umwiherero, aho abakinnyi bakina hanze y’u Rwanda bagiye basanga bagenzi babo mu mwiherero. FERWAFA yatangaje ko u Rwanda ruzakira Liberia kuri Stade Amahoro, mbere yo kujya i Praia muri Cabo Verde ku itariki ya 29 Nzeri 2026 gukina umukino wa kabiri.

U Rwanda ruheruka gukina mu mikino ya nyuma y’Igikombe cya Afurika mu 2004, bityo abakinnyi n’abatoza bakaba bafite intego yo kongera kurugarura muri iri rushanwa. Mu 2007, ubwo u Rwanda rwaherukaga kwakira Liberia muri Stade Amahoro, Amavubi yatsinze ibitego 4-0.

Amatike y’uyu mukino yatangajwe ko atangirira ku mafaranga 2,000 Frw, mu gihe Stade Amahoro ifite ubushobozi bwo kwakira abarenga ibihumbi 45.

KWIHANGANA Emmanuel/Radio Salus