Umuhanzikazi Utah Nice yatangaje ko indirimbo “My Mind” yahuriyemo na Chriss Eazy yabaye imwe mu ndirimbo zamuhesheje impinduka zikomeye mu rugendo rwe rwa muziki, avuga ko yaje nk’amahirwe adasanzwe atari yarateganyije.
Ibi yabigarutseho nyuma yo kwitabira igitaramo cya MTN Iwacu Muzika Festival 2026 cyabereye mu Karere ka Musanze, aho yavuze ko uburyo iyo ndirimbo yakozwemo bwatunguranye ndetse bukagenda neza kurusha uko yari abyiteze.
Utah Nice yasobanuye ko Chriss Eazy yayumvise binyuze ku bantu ba hafi ye, ayikunda kuva ku nshuro ya mbere, bityo yemera kuyigaragaramo. Uwo muhanzikazi yavuze ko ubwo bufatanye bwagize uruhare runini mu gutuma izina rye rimenyekana cyane mu bakunzi b’umuziki nyarwanda.
Yagaragaje ko kuva iyo ndirimbo yasohoka, umubare w’abamukurikira ku mbuga nkoranyambaga wiyongereye ku rwego rushimishije, ndetse ibikorwa bye bikitabirwa kurushaho ku mbuga zicururizwaho umuziki zirimo YouTube na Spotify.
Abasesenguzi b’umuziki bavuga ko “My Mind” iri mu ndirimbo zagize uruhare mu kugaragaza impano ya Utah Nice ku rwego rwagutse, cyane cyane mu rubyiruko rukunda injyana zigezweho.
Mu gihe akomeje kwagura ibikorwa bye, Utah Nice yatangaje ko ari gutegura izindi ndirimbo nshya ndetse n’imishinga itandukanye izajya hanze mu minsi iri imbere. Yavuze ko afite intego yo gukomeza kuzamura urwego rw’umuziki we no kugera ku masoko mashya haba mu Rwanda no hanze yarwo, ashingiye ku ntsinzi n’icyizere yakuye kuri “My Mind”.
KWIHANGANA Emmanuel/Radio Salus
Ibitekerezo 0
Tanga igitekerezo
Nta bitekerezo bihari.